VÖRURNAR OKKAR

Birki- og eplabrjóstsykurinn er fullkomin blanda af sætu og súru. Þó birkið sé algengasta tréð á Íslandi hefur það ekki verið mikið notað í matseld fram að þessu en það er í miklu uppáhaldi hjá okkur. Bragðið af ferska græna eplinu ásamt örlitlu af biturleika birkisins gerir þennan brjóstsykur einstaklega ferskan og góðan.

Innblásturinn af hvannar-og sólberjabjóstsykrinum var áhugi okkar á óvenjulegum samsetningum af íslenskum jurtum. Íslenska ætihvönnin er þekktust hér á landi fyrir lækningaeiginleika sína en bragðið á ekki síður athygli skylda. Það kom okkur á óvart hversu vel sólber og hvönn eiga saman en bæði njóta sín einstaklega í þessum mola.

Það sem heillaði okkur við blóðbergs-og bláberjabrjóstsykurinn okkar var að prófa að blanda saman tveimur jurtum sem eru sjaldan notaðar saman í íslenskri matargerð. Ferlið reyndist heldur flókið þar sem erfitt er að fá næga olíu úr blóðberginu en okkur tókst það á endanum með því að búa til okkar eigin tinktúru úr því. Það kom okkur skemmtilega á óvart að þrátt fyrir að vera óvenjuleg blanda eiga blóðbergið og bláberin fullkomlega saman.